Dentro do programa de 'Mejor, informados', no que FEDACE colabora co CEADAC.
A directora de Sarela, Rocío García, participa a vindeira semana no programa 'Mejor, informados' de
FEDACE cun obradoiro destinado a persoas con dano cerebral adquirido. A sesión vaise desenvolver o sábado, 13 de xuño, nas instalacións do
CEADAC.
'Mejor, informados' é un programa de sesións informativas organizado pola Federación Española de Daño Cerebral. Conta con tres vertentes: para profesionais sociosanitarios, para familiares e persoas coidadoras, e para persoas con dano cerebral adquirido.
Rocío García vai impartir unha charla sobre a xestión persoal de cambios emocionais e cognitivos dirixida a persoas con DCA. O título da actividade informativa é 'Convivindo co dano cerebral. E agora que?, e ocupará de 10:00 a 11:30. A continuación, o sexólogo e psicólogo Carlos de la Cruz falará sobre 'Sexualidade e dano cerebral' entre as 12:00 e as 13:00. Toda a actividade informativa será nas instalacións do CEADAC (Centro de Referencia Estatal de Atención ao Dano Cerebral), en Madrid, o sábado, 13 de xuño.
O obradoiro para persoas con DCA continúa o 14 de novembro cunha segunda sesión sobre 'Habilidades sociais e competencias persoas para a reinserción laboral' e sobre 'Alternativas ocupacionais e de xestión do lecer e o tempo libre tras o dano cerebral adquirido'.
Familiares e profesionais
'Mejor, informados' conta con programación destinada a profesionais sanitarios. Haberá sesións o 18 de setembro e o 13 de novembro e nelas falarase sobre 'Dano cerebral adquirido e familias' e sobre 'Boas prácticas de atención ao DCA en contextos sanitarios'.
Familiares e persoas coidadoras recibiron xa unha sesión informativa o pasado 23 de maio na que se abordaron os aspectos máis básicos da convivencia coa persoa con dano cerebral adquirido. Para o 28 de novembro queda unha segunda sesión na que se falará de autocoidado, do impacto do DCA na familia e da aceptación, entre outros temas.