• XSolidaria 2021 png

Noticias

FEGADACE dedica a Xornada sobre o Dano Cerebral Adquirido a Información e toma de decisións: unha mirada desde a ética

FEGADACE dedica a Xornada sobre o Dano Cerebral Adquirido a Información e toma de decisións: unha mirada desde a ética

A abordaxe do dano cerebral adquirido (DCA), sexa desde unha perspectiva social ou sanitaria, implica a toma de decisións difíciles en situacións de especial vulnerabilidade para a persoa directamente implicada, para a súa familia, e para os equipos profesionais implicados na atención. Dispoñer de información clara e accesible e do acompañamento e apoio técnico necesarios é fundamental para o correcto exercicio dos dereitos das persoas e familias con dano cerebral.

 

Á Federación Galega de Dano Cerebral (FEGADACE), como entidade de referencia desta discapacidade e representativa de máis de 1.700 familias en Galicia, preocúpalle que os procesos de deliberación se realicen baixo criterios éticos, que se deben manter, asemade, á hora de informar sobre calquera aspecto desta discapacidade. É por iso que dedica a súa Xornada sobre o Dano Cerebral Adquirido de 2019 á reflexión sobre ‘Información e toma de decisións: unha mirada desde a ética’.

 

Nesta #XornadaDCA tamén se vai facer entrega do 7º Premio FEGADACE - Miguel Blanco á Unidade de Odontoloxía para Pacientes con Necesidades Especiais da Facultade de Medicina e Odontoloxía da Universidade de Santiago de Compostela (USC), que recollerá o seu director, o catedrático de Estomatoloxía Pedro Diz Dios.

 

O encontro vai ter lugar na mañá do sábado 28 de setembro na Facultade de Filosofía da USC, en Santiago de Compostela, de 9:00 a 14:45 hh.

 

Ética para a atención e tamén para a comunicación

 

O programa comeza ás nove e media da mañá coa intervención do psicólogo clínico do Complexo Hospitalario Universitario de Santiago (CHUS), especialista en Bioética e estreito colaborador do movemento asociativo do DCA, Miguel Anxo García Álvarez, que vai reflexionar sobre ‘Como protexer o que é valioso en situación de conflito ético?’, achegando a súa experiencia na atención directa e como membro do Comité de Bioética do CHUS.

 

A continuación a profesora da Universidade de Deusto María Jesús Goikoetxea vai introducir ‘O papel dos comités de ética en servizos sociais’ (10:30), unha figura que aínda non está implantada en Galicia, onde os comités de ética se limitan ao ámbito sanitario. Goikoetxea é doutora en Dereitos Humanos e máster en Bioética e en Ética para a construción social.

 

O incipiente interese por informarse sobre saúde a través da internet tamén está suxeito a riscos éticos. É por iso que está prevista unha intervención (12:30) sobre ‘Saúde na Rede. Como diferenciar a información veraz dos bulos?’, que vai conducir María José Cachafeiro. É farmacéutica, forma parte da Asociación de Investigadores en eSalud (AIES) e do equipo de “cazabulos” da iniciativa #SaludsinBulos, na que profesionais da sanidade, pacientes e xornalistas se unen para combater as mentiras sobre saúde e pseudoterapias na rede.

 

Pechará a Xornada o profesor e investigador da Escola Andaluza de Saúde Pública José Luis Bimbela (13:30), cunha sesión sobre ‘Ética práctica para unha mellor comunicación no ámbito socio-sanitario’. Bimbela é doutor en Psicoloxía, máster en Saúde Pública, e está especializado na aplicación de técnicas emocionais, de comunicación e de motivación para axudar a coidar ás persoas que coidan, contribuíndo a evitar o estrés ou “queime” que se sofre tanto a nivel de intervención profesional como a nivel de coidado informal no ámbito familiar.

 

Inscrición aberta

 

A Xornada sobre o Dano Cerebral Adquirido está dirixida a profesionais do ámbito sanitario, da intervención social, da reflexión filosófica ou da comunicación, estudantado das mesmas áreas, familiares e persoas con dano cerebral adquirido, ao contorno asociativo da discapacidade e das agrupacións de pacientes, e a calquera outra persoa interesada.

 

A inscrición é aberta e gratuíta ata completar o aforo do Salón de Actos da Facultade de Filosofía da USC. Para tramitala cómpre cubrir este formulario online.

 

Entrega do 7º Premio FEGADACE – Miguel Blanco

 

Durante a mañá vai ter lugar o acto de entrega do 7º Premio FEGADACE – Miguel Blanco á Unidade de Odontoloxía para Pacientes con Necesidades Especiais da Facultade de Medicina e Odontoloxía da USC. A Xunta Directiva de FEGADACE decidiu recoñecer “o coidado da hixiene bucodental que a Unidade leva prestando desde 1992 ao colectivo de persoas con DCA en Galicia, e o seu labor divulgativo a favor dos dereitos das persoas con discapacidade e en contra das barreiras que dificultan o seu pleno acceso ao dereito á saúde”.

 

A Unidade naceu para paliar a especial vulnerabilidade e risco para a saúde dental que teñen as persoas con discapacidade, garantindo o acceso a unha correcta hixiene oral, o que incrementa a autonomía e a autoestima da persoa con dano cerebral adquirido, repercutindo no seu bo prognóstico xeral de recuperación e/ou mantemento de capacidades.

 

Vai recoller o galardón o director da Unidade e catedrático de Estomatoloxía da USC Pedro Diz Dios, que realizará unha intervención sobre traxectoria da entidade e o dereito á saúde oral. A Federación comprácese en anunciar que a entrega vai ser realizada por Miguel Ángel Verdugo, catedrático de Psicoloxía da Discapacidade e director do Instituto Universitario de Integración na Comunidade (INICO) da Universidade de Salamanca, entidade premiada en 2018.

 

(Información da web de FEGADACE)

 

Categorías: FEGADACE
Tags: FEGADACE

USO DE COOKIES

Utilizamos cookies propias y de terceros para mejorar su experiencia y nuestros servicios, así como mostrarle, desde nuestro sitio web o los de terceros, publicidad basada en el análisis de sus hábitos de navegación. Si pulsa en aceptar, consideramos que admite su uso.
Puede obtener más información en nuestra Política de Cookies.

Aceptar Rechazar