Fotografía da reunión entre representantes de Sarela e o xerente do Sergas, José Flores

Unha representación de persoas con dano cerebral e familiares expoñen a José Flores, xerente do SERGAS, propostas para mellorar a atención unha vez recibida a alta hospitalaria

29/10/2021

Destacan a calidade da atención médica que recibiron pero piden máis información e contar con equipos especializados en dano cerebral na rehabilitación. Luciano Fernández, presidente de FEGADACE e secretario de Sarela, trasladou que as entidades como Sarela están a achegar solucións ao sistema de saúde pero ás familias non se lles está a informar da súa existencia cando non se lles dá alternativas para continuar a rehabilitación e atención especializada.

Esta mañá o xerente do SERGAS (Servizo Galego de Saúde) José Flores visitou o centro de Sarela (Asociación de Dano Cerebral de Compostela) onde mantivo unha reunión cunha representación de familias e persoas con DCA, membros da xunta directiva de Sarela e FEGADACE (Federación Galega de Dano Cerebral) e profesionais para coñecer de primeira man as necesidades de atención das persoas e familias e coñecer o traballo que desenvolve a entidade proporcionado unha atención integral e especializada.

 

Nesta reunión foron as persoas e familias as que expuxeron a súa vivencia persoal para exemplificar os problemas que tiveron principalmente no momento en que reciben a alta hospitalaria. Enrique Martínez, que ten dano cerebral a consecuencia dun ictus, e Amparo Gómez e Jesús Ricoy, nai e pai dunha nena con dano cerebral, destacaron e agradeceron o tratamento médico que recibiron no momento en que se produce a lesión, a pronta resposta asistencial e medios destinados a salvar a vida e minorar as posibles secuelas.

 

Visita a Sarela do xerente do Sergas, José Flores.

Sen embargo quixeron manifestar que na actualidade existen eivas e carencias no sistema no momento en que a persoa é dada de alta no hospital e debe continuar coa rehabilitación. Destacaron que as familias non reciben toda a información que precisan para afrontar esta nova vida e reivindicaron a necesidade de contar con equipos especializados formados por logopedas, terapeutas ocupacionais, psicólogos, fisioterapeutas, traballadores sociais... Esta discapacidade caracterízase por ter unhas secuelas diferentes e heteroxéneas, e xeran distintos tipos e niveis de discapacidade segundo a persoa e a lesión.

 

Neste sentido Luciano Fernández, secretario de Sarela e presidente de FEGADACE, destacou que as entidades de Dano Cerebral como Sarela están a achegar solucións ao sistema de saúde pois son recursos especializados en atención ao DCA que escasean no sistema público. A pesar diso, Luciano Fernández, lamentou que ás familias non se lles está a informar da existencia destes centros cando á vez non se lles dá alternativas no sistema público para continuar a rehabilitación e atención especializada en dano cerebral.

 

Pola súa banda Ana Ruiz, coordinadora do Servizo de Atención Especializada de Sarela, puxo de relevo que o traballo das entidades galegas de dano cerebral atenden aspectos que non son atendidos desde o sistema público como é o Servizo de información, orientación e apoio a familias que proporciona ferramentas e recursos necesarios para afrontar a súa nova situación.

 

Durante a reunión José Flores, xerente do SERGAS, amosou interese pola situación das familias e recoñeceu que as asociacións de pacientes complementan e forman parte do sistema de saúde global. Por iso, afirmou, son un complemento necesario e que se traballa en mellorar a coordinación coas mesmas.

 

 

Categorías: Familias
Tags: familias
Compartir en:

USO DE COOKIES

Utilizamos cookies propias y de terceros para mejorar su experiencia y nuestros servicios, así como mostrarle, desde nuestro sitio web o los de terceros, publicidad basada en el análisis de sus hábitos de navegación. Si pulsa en aceptar, consideramos que admite su uso.
Puede obtener más información en nuestra Política de Cookies.

Aceptar todas Configurar Cookies Más información