Sarela participa no calendario solidario a favor de FEDACE da Fundación Línea Directa

Doce atletas de Tokio 2020 posaron con persoas con dano cerebral, entre elas a socia de Sarela Montse Terceiro (na imaxe xunto a Álex Sánchez, bronce en tríatlon paralímpico). O calendario está a venda a través de Amazon a un prezo de 10 euros e a recadación irá destinada a proxectos da Federación Española de Dano Cerebral.

A Fundación Línea Directa publicou onte, en colaboración coa Federación Española de Dano Cerebral (FEDACE), un calendario solidario que visibiliza ás persoas con Dano Cerebral e as súas familias. Nel doce atletas olímpicos e paralímpicos medallistas nos Xogos de Tokio 2020 como Alberto Fernández, Beatriz Ortiz ou Adi Iglesias posaron con doce persoas con dano cerebral.

O calendario púxose á venda a través de Amazon a un prezo de dez euros. Conta cunha marcada compoñente solidaria, xa que a recadación obtida irá destinada integramente a proxectos da Federación Española de Dano Cerebral. Ademais do recadado, a Fundación Línea Directa realizará unha doazón directa de 3.000€ á Federación.

Deportistas de primeiro nivel

Cada un dos meses do calendario mostra fotografías conxuntas dun medallista olímpico ou paralímpico de Tokio 2020 xunto a unha persoa con dano cerebral usuaria dunha das asociacións membro de FEDACE, entre elas, unha usuaria de Sarela (as outras forman parte de ADACE CLM, AFADACS Torrejón, DACE Sevilla e ICAM Ictus Madrid).

Estas imaxes reflicten o paralelismo entre o esforzo deportivo e o afán diario de superación das persoas con dano cerebral por mellorar a súa autonomía e calidade de vida. Son fotografías de persoas con forza, coraxe e ilusión por sacar o mellor de si mesmas.

En concreto, as deportistas que aparecen no calendario son:

• Adi Iglesias, ouro e prata atletismo paralímpico.

• Alberto Fernández, ouro en tiro olímpico.

• Álex Sánchez, bronce en tríatlon paralímpico.

• Beatriz Ortiz, prata en waterpolo olímpico.

• Carlos Arévalo, prata en piragüismo olímpico.

• Iván Cano, prata en salto de lonxitude paralímpico.

• Luis Miguel García- Marquina, bronce en ciclismo paralímpico.

• Nico Rodríguez, bronce en vela olímpica.

• Pablo Jaramillo, bronce en ciclismo paralímpico.

• Pili Peña, prata en waterpolo olímpico.

• Rodrigo Germade, prata en piragüismo olímpico.

• Sarai Gascón, prata e bronce en natación paralímpica.

Sobre esta iniciativa solidaria, a directora xeral de Fundación Línea Directa, Mar Garre, destacou que “o obxectivo desta acción é recoñecer a loita diaria e o afán de superación tanto dos deportistas como das persoas con Dano Cerebral”.

Desde FEDACE agradeceuse o xesto da Fundación Línea Directa, que dá visibilidade o gran traballo de autosuperación que realizan as persoas con dano cerebral e as súas familias despois de que a súa vida cambie por completo de maneira súbita e inesperada: un esforzo diario que neste calendario solidario móstrase como un éxito olímpico.