Horarios adaptados para orientarse polas actividades

A primeira actividade do día no centro de día de Sarela é a de orientación e actualidade. A medida que van chegando, as persoas usuarias sitúanse nunha das salas, consultan os seus horarios e ven como teñen programado o día. Despois pasan un rato comentando as noticias de actualidade.

 

Cada persoa ten un cadro coa súa planificación semanal de actividades que lle serve para orientarse no día a día. Estas actividades establécense de acordo cos obxectivos que cada persoa debe traballar durante o ano. A logopeda elabora os horarios, e axuda a cada usuario ou usuaria a adaptar o soporte ás súas necesidades.

 

Hai horarios que incluén texto e imaxes (pictogramas, fotografías, etc.). A causa é que a persoa propietaria le de maneira global, o que implica que é quen de ler palabras coñecidas, pero non calquera texto. Coa axuda do velcro, etiquetas de texto e pictogramas únense á base, na que están delimitadas as pausas e horas de entrada e saída.

 

Todos están plastificados para que o seu manexo sexa sinxelo no caso de persoas que teñen danada a motricidade fina.

 

Para persoas que non saben ler, o horario adáptase coa axuda de pictogramas ou imaxes. O seu tamaño é moi grande se a persoa ten dificultades de visión, e prégase para que sexa doado gardalo. Todas as actividades están expresadas a través de imaxes unidas ao soporte con velcro.

 

Hai usuarios e usuarias que poden facer por si mesmas o seu horario. Nese caso, a intervención da logopeda é mínima, favorecendo que sexa a persoa con DCA quen o elabora.

 

As persoas que poden ler teñen horarios escritos. Aínda así, todos eles son de distintos tamaños, dependendo da capacidade de visión que teña cada persoa.